Макулдашууга эки өлкөнүн өкмөттөрү 2023-жылы июлда кол коюп, быйыл марттын аягында документ ратификациялоо үчүн тажик парламентинин төмөнкү палатасына жөнөтүлгөн.
11-апрелде парламенттеги талкуу учурунда Тажикстандын коргоо министри Шерали Мирзо Анкара Түркиянын коргонуу-өнөр жай комплексинен Душанбеге аскердик техникаларды, анын ичинде учкучсуз учуучу аппараттарды сатып алуу үчүн 50 миллион лира (1,5 миллион доллардан ашык) бөлө турганын билдирген.
"Бул келишим азыркы замандын коркунучтарына, анын ичинде экстремизмге жана терроризмге каршы күрөшүү үчүн маанилүү", – деген министр.
16-апрелде "Озоди" радиосу Түркия менен Тажикстандын ортосундагы тиешелүү макулдашуунун тексти менен таанышып чыккан. Анда келишимдеги негизги шарттардын бири катары Тажикстан түрк өкмөтүнүн каражатын түркиялык компаниялардан аскердик техника сатып алууга гана колдонуусу керектиги белгиленген. Документте ошондой эле түрк өкмөтүнүн бюджетинен 1,5 миллион доллар бөлүнүп, Тажикстан аны беш жыл ичинде колдонуусу керектиги, эгер алына турган аскердик техниканын баасы 1,5 миллион доллардан ашса, калган сумманы Тажикстан өзү төлөрү жазылган. Мындан тышкары Тажикстан алган жабдыктарды Түркиянын макулдугусуз үчүнчү өлкөгө бере албай турганы белгиленген.