Пештар ӯро дар боздоштгоҳи муваққат ҷо карда буданд.
Ҳамзамон вазорати маориф ва илми Қирғизистон хабар дод, ки баргузории чорабиниҳои оммавии хонандагон дар доираи озмуни ҷумҳуриявии “Урааним Манас” дар саросари ин кишвар “ба далелҳои амниятӣ” манъ карда шудааст.
Ин ниҳод афзуда, ки вазири маориф ва илми Қирғизистон ДогдурҚул Кендирбоев 3 май ба ноҳияи Сузаки вилояти Ҷалолобод барои аёдати кӯдаконе рафта, ки дар ҷараёни чорабинии шеърхонии 2 май мошини “Портер” онҳоро пахш карда буд.
Мошини “Портер” 2-юми май дар Сузак 29 кӯдакро замоне пахш кард, ки хонандагон дар ҷамъомаде дар доманакуҳ дар маъракае шеърхонӣ мекарданд.
Дар навори ҳодиса, ки ба шабакаҳои иҷтимоӣ роҳ ёфт, дида мешавад, мошини “Портер” аз баландӣ ба ҳаракат даромада, кӯдаконро пахш мекунад. Мақомот гуфтанд, ронанда дар дохили мошин набуд.
Вазорати тандурустии Қирғизистон гуфт, аз 29 кӯдаке, ки дар ҳодиса маҷруҳ шуданд, 7 нафарашон дар шуъбаи эҳё ҳастанд. Аҳволи се нафари онҳо вазнин гуфта мешавад. Пизишкон вазъи ҳашт кӯдаки дигарро вазнини миёна гуфтанд. Ба 11 нафари дигар дар ҷойи ҳодиса кумаки тиббӣ расонда, онҳоро барои идомаи табобат ба беморхона фиристоданд. Захмиён аз 9 то 16 сола будаанд.
Мақомоти Қирғизистон гуфтанд, ҳодисаро таҳқиқ доранд. Соҳиби мошин, марди 48-сола будааст.