Дар хадамоти матбуотии додгоҳ ба бахши қирғизии Радиои Озодӣ гуфтанд, дархости Мадумаров ба далели "сипарӣ шудани муҳлати шикоят" рад шудааст.
Мадумаров 29 апрел аз бодои қарори Додгоҳи ноҳияи Якуми май, ки ӯро дар хиёнат ба давлат гунаҳкор донист, ба Додгоҳи Бишкек шикоят бурд. Ҳамчунин аз додгоҳ хост, қарори Комисияи марказии интихобот ва раъйпурсии Қирғизистон дар бораи бекор кардани мандати вакилии ӯ ғайриқонунӣ дониста шавад.
Додгоҳи ноҳияи Якуми май ахиран вакили порлумон ва раиси ҳизби мухолифи "Бутун Қирғизистон"-ро дар хиёнат ба давлат айбдор донист, вале ба далели сипарӣ шудани муҳлати эътибор ӯро озод кард. Парвандаи Мадумаров пушти дарҳои баста баррасӣ шуд.
Вакили дифои сиёсатмадор Гуляна Убалиева гуфта буд, ки Мадумаров дар "хиёнат ба давлат" муттаҳам мешавад. Убалиева тасдиқ кард, парванда ба санади марбут ба қитъаи Торт-Кочо дар марзи Қирғизистону Тоҷикистон рабт дорад, ки Адахон Мадумаров дар замони котиби Шӯрои амнияти Қирғизистон буданаш дар соли 2009 имзо кардааст. Мадумаров худро бегуноҳ ва парвандаашро "сиёсӣ" меномад.