Қирғизистонда вирусли гепатит Б, С ва ОИВнинг тарқалиши ва хавф омилларини баҳолаш бўйича миллий тадқиқот ўтказилади.
Бу ҳақда Республика саломатликни мустаҳкамлаш ва оммавий коммуникация маркази хабар бермоқда.
Тадқиқот 24 июндан бошланади ва республиканинг барча ҳудудларини қамраб олади.
Тадқиқот самарали профилактика стратегияларини ишлаб чиқиш мақсадида ўтказилмоқда.
Соғлиқни сақлаш вазирлигининг махсус гуруҳи 5 ёшдан 17 ёшгача бўлган болалар, шунингдек, тасодифий хонадонлардаги катталар ўртасида анкеталаш ўтказади ва қон олади.
Сўнгги йилларда Қирғизистонда ОИВ инфекциясини жинсий алоқа орқали юқтириш ҳолатлари кўпайган. 2023 йилда 1006 та янги ОИВ ҳолати қайд этилган бўлса, шундан 824 таси жинсий йўл билан юқтирилган.
2023 йил декабрь ҳолатига, Қирғизистонда жами 13 030 кишида ОИВ аниқланган.Шулардан 3233 киши вафот этган.
Аввалроқ Соғлиқни сақлаш вазири Алимқодир Бейшеналиев Қирғизистонда гепатит билан касалланган 18 минг 326 бемор рўйхатга олинганини маълум қилган эди.