Қирғизистон нефть трейдерлари уюшмаси раҳбари Канат Эшатовнинг маълум қилишича, Қирғизистонда автомобиллар учун суюлтирилган газ танқислиги йўқ, ёқилғи танқислиги эса фақат кичик ёқилғи қуйиш шохобчаларида учрамоқда.
Бу ҳақда 9 июль куни Эшатов Озодлик радиосига берган интервьюсида маълум қилди.
Аввалроқ, Бишкеклик ҳайдовчилар ва айрим вилоятлар аҳолиси шохобчаларда автогаз йўқлигидан шикоят қилган эди.
Эшатовнинг сўзларига кўра, 1-2 та ёқилғи қуйиш шохобчасига эга кичик компанияларда автогаз йўқ, чунки йирик компаниялардан фарқли ўлароқ, улар газни етказиб берувчи заводлардан тўғридан-тўғри олмайди.
"Заводлар билан шартнома тузган йирик компанияларда газ бор ва у сотилмоқда. Баъзан навбатлар бўлиши мумкин, холос. Россия темир йўлларида муаммолар сабабли бироз кечикишлар бўлган," - деди у.
Эшатовнинг таъкидлашича, Қирғизистонда автомобилларнинг 10 фоиздан камроғи газда ҳаракатланади. "Бизнинг асосий вазифамиз - бензин ва дизель ёқилғиси билан таъминлаш, автогаз ҳам олиб келинади ва у йирик АЁҚШларда бор. Умуман олганда, ҳаяжонланишга ҳеч қандай сабаб йўқ," - дея қўшимча қилди у.
Автомобилларга ёқилғи қуйиш шохобчаларида газ танқислиги ҳақида аввалроқ ОАВ ва ижтимоий тармоқ фойдаланувчилари хабар берган эди. Ўшанда ҳам Эшатов Россия темир йўлида цистерна-вагонлар етишмаслиги сабабли баъзи ёнилғи қуйиш шохобчаларида газ бўлмаганини таъкидлаб, бу мавсумий ҳодиса эканини айтган эди.
Қирғизистон нефть трейдерлари уюшмаси автогаз тақчиллиги ҳақидаги маълумотларга изоҳ берди
"Бизнинг асосий вазифамиз - бензин ва дизель ёқилғиси билан таъминлаш, автогаз ҳам олиб келинади ва у йирик АЁҚШларда бор. Умуман олганда, ҳаяжонланишга ҳеч қандай сабаб йўқ," - дея изоҳ берди уюшма раҳбари.