Ссылки доступа

Украинага қарши жанг қилмоқчи бўлган Ўзбекистон фуқаросининг озодлиги 3 йилга чекланди


Қорақалпоғистонлик йигит Россия қуролли кучларида хизмат қилиш учун шартнома имзолаган.

Жиноят ишлари бўйича Қорақалпоғистоннинг Амударё туман суди Россия армиясида хизмат қилиш учун шартнома имзолаган, бироқ жанговар тайёргарликни тамомлагач, ҳарбий лагердан қочиб, Ўзбекистонга қайтган фуқаронинг озодлигини 3 йилга чеклади.

Ҳукм 24 июнь кунида чиққан, бироқ бу ҳақида энди маълум бўлди деб ёзади "Газета.uz".

Тергов маълумотига кўра, 23 ёшли йигит 2023 йил декабрь ойида Россияга ишлаш учун кетган. У Москвада турли қурилиш майдонларида ишлаган, кейин тунги клубда буфетчи бўлган, бироқ маоши оила харажатларига етмаган.

5 февраль куни у Россия қуролли кучларида хизмат қилиш учун шартнома имзолашга қарор қилган. Шартномага кўра, у Украинага қарши ҳарбий амалиётларда қатнашгани учун бир марталик 195 минг рубль (тахминан 27,9 миллион сўм), сўнгра ВТБ банк картасига ойига 240 минг рубль (34,3 миллион сўм) олиши керак бўлган.

У 24 нафар Россия, Ўзбекистон ва Тожикистон фуқаролари билан биргаликда Москва вилоятидаги «Авангард» ҳарбий лагерида махсус жанговар тайёргарликдан ўтиб, оддий аскар ва ўқчи лавозимини эгаллаган. Бироқ у, Украинага қарши урушда оёғидан жароҳат олган зобит ҳикоясини эшитиб қўрқиб кетган ва отаси касал эканини айтиб, қисқа муддат хизматдан бўшатишни сўраган. Шундан сўнг у Ўзбекистоннинг Москвадаги дипломатлари ёрдамида Ўзбекистонга қочиб кетган.

Суд унинг қарамоғида вояга етмаган фарзанди борлиги, у муқаддам судланмагани ва жанговар ҳаракатларда қатнашмаганини ҳисобга олиб, унга 3 йил муддатга озодликни чеклаш жазосини тайинлади.

Унга соат 21:00 дан 06:00 гача уйидан чиқиш ва рухсатсиз ҳудуддан чиқиб кетиш тақиқланган.

Аввалроқ Оҳангарон суди "Вагнер" ҲХК сафида жанг қилган ўзбекистонлик Шавкат Йўлдошевга ахлоқ тузатиш ишлари тариқасидаги жазони қўллаган эди.

XS
SM
MD
LG