Чеченистон раҳбари Рамзан Қодиров Ўзбекистон президенти Шавкат Мирзиёевга туғилган куни муносабати билан икки зотдор от совға қилди. Бу ҳақда Рамзан Қодировнинг ўзи хабар тарқатди.
"Мирзиёевнинг бу олижаноб жониворларга бўлган муҳаббатини билган ҳолда, бу совға унга маъқул келишига ишонаман," - деб ёзган Қодиров ўзининг Телеграм каналида.
"Шунингдек, Шавкат Миромонович ва Ўзбекистоннинг барча аҳолисига ўз номимдан энг самимий тилакларимни етказишни сўрадим. Чеченистонда биз минтақаларимиз ўртасида қарор топган яқин қардошлик муносабатларидан жуда фахрланамиз ва уларни қадрлаймиз. Албатта, бунда шахсан Шавкат Миромоновичнинг хизмати катта," - деди Чеченистон раҳбари.
Ўзбекистон президенти Шавкат Мирзиёев 24 июль куни таваллудининг 67 йиллигини нишонлади.
Жорий йилнинг май ойида Рамзан Қодиров Ўзбекистонга ташриф буюрган эди. Ўшанда у Тошкентда отаси - республиканинг биринчи президенти Аҳмад Ҳожи Қодиров билан боғлиқ жойларга ташриф буюрган. Аҳмад Ҳожи Қодиров 1982 йилда Бухоро Мир Араб мадрасасини, 1986 йилда Тошкент ислом институтини тамомлаган.
Рамзан Қодиров Ўзбекистон президентига иккита зотдор от совға қилди
Ўзбекистон президенти Шавкат Мирзиёев 24 июль куни таваллудининг 67 йиллигини нишонлади.