Қозоғистон Ташқи ишлар вазирлиги давом этаётган ғалаёнлар деб фуқароларни Бангладешга сайёҳатдан тийилишга чақирди.
"Ҳозирда Бангладешда бўлиб турган фуқаролардан фавқулодда зарурат бўлмаганда ўз яшаш жойларини тарк этмасликни, юқори хавфсизлик чораларига риоя қилишни, ҳушёрлик ва эҳтиёткорликни, янгиликларни кузатиб боришни ва ҳукумат тавсияларига амал қилишни, шунингдек, Қозоғистон Ташқи ишлар вазирлиги ва элчихонаси билан алоқада бўлишни сўраймиз," - дейилади хабарда.
Бангладеш бош вазири Шайх Ҳасина мамлакатда давом этаётган норозилик чиқишлари манзарасида истеъфога чиқиб, мамлакатни тарк этган.
Айни пайтда мамлакат пойтахти Даккада минглаб одам шаҳар марказига юриш қилиб бормоқда. Улар орасида аёллар ҳам кўп.
Аввалроқ Бангладешда қайта авж олган норозилик чиқишлари чоғида 300 киши ҳалок бўлган эди.
Бангладешда намойиш бошланишига ёшлар орасида ишсизлик даражаси жуда юқори бўлганига қарамай, давлат хизматчиларини ишга олишда махсус квоталар тизими киритилгани сабаб бўлган. Норозилик чиқишларида июль ойи охирида 200 га яқин одам ҳалок бўлгани ортидан улар аксилҳукумат намойишларига айланиб кетган.
Норозиликларнинг янги тўлқини чоғида бош вазир истеъфосини талаб қилган намойишчилар ҳукумат бинолари, депутатлар уйлари ва полиция участкаларини вайрон қила бошлаган.
Шайх Ҳасина 15 йилдан бери ҳокимият тепасида бўлиб, шу йил январида у 4-марта бош вазирлик курсисини эгаллаган эди.
Норозилик чиқишлари авж олган бир ҳафта ичида Бангладешда 11 мингдан зиёд одам ҳибсга олинган эди.
Бангладешда норозилик чиқишлари давом этмоқда.