"Атқарушы комитет отырысының шешіміне сәйкес, Өзбекстан президенті Шавкат Мирзияевтің кенже қызы Шахноза Мирзияева Ұлттық паралимпиада комитеті төрағасының бірінші орынбасары қызметіне сайланды" деп таратты комитеттің баспасөз қызметі.
Мекеме мәліметінше, Шахноза Мирзияева қазір Ұлттық әлеуметтік қорғау агенттігі директорының бірінші орынбасары қызметін атқарып жүр. Оған дейін өзбек президентінің кенже қызы мектепке дейінгі білім министрлігіне қарасты басқарма төрағасының орынбасары болған.
Орталық Азия елдері басшыларының балалары мен туыстары өз елінде жоғары қызметтерді жиі атқарады. Жақында Шахноза Мирзияева күйеуі Отабек Умаровпен бірге Париждегі ойындардан жүлдемен оралған атлеттерді ұлықтау салтанатына қатысқан. Отабек Умаров Азия олимпиада комитетінің вице-президенті қызметін атқарады.
28 тамыз бен 8 қыркүйек аралығында Парижде XVII жазғы Паралимпиада ойындары өтеді. Оған Өзбекстаннан спорттың тоғыз түрі бойынша 60-тан аса спортшы барады.