Муваққат ҳукуматнинг собиқ аъзоси Азимбек Бекназаров жиноий даромадларни легаллаштиришда гумонланмоқда. Бу ҳақда Қирғизистон Миллий хавфсизлик давлат қўмитаси матбуот хизмати хабар берди.
"2010 йил апрель воқеаларида банк ячейкалари ва Ҳукумат уйидан олиб қўйилган пул маблағларини талон-торож қилиш бўйича жиноий иш қўзғатилди. Терговда муваққат ҳукуматнинг собиқ аъзоси Азимбек Бекназаровнинг мазкур ҳолатларда ҳуқуқни муҳофаза қилувчи органлар томонидан олиб қўйилган катта миқдордаги пулларни ўзлаштиришда иштироки аниқланган," - дейилади хабарда.
У бу пулларни Иссиқкўл, Бишкек, Чуй ва Жалолобод вилоятларида қимматбаҳо кўчмас мулк объектларини сотиб олиш ва уларни сохта шахсларга расмийлаштириш орқали легаллаштирилганликда айбланмоқда.
Шу муносабат билан 12 сентябрь куни Азимбек Бекназаров МХДҚ Тергов ҳибсхонасига олиб келинган. Қонунда белгиланган муддатларда унга айблов эълон қилиниши, суд эса тергов вақтида эҳтиёт чорасини танлаш масаласини ҳал қилиши айтилмоқда.
Азимбек Бекназаров "Кампиробод иши" бўйича ҳам жавобгар сифатида ўтмоқда. Бу иш бўйича "оммавий тартибсизликларга чақирув ва ҳокимиятни эгаллаб олишга уринишда" айбланаётган 22 нафар сиёсатчи ва фаол июнь ойида оқланган эди.
Қирғизистонда сиёсатчи Азимбек Бекназаров жиноий даромадларни легаллаштиришда айбланмоқда
Муваққат ҳукуматнинг собиқ аъзоси Азимбек Бекназаров 2010 йил апрель воқеаларида банк ячейкалари ва Ҳукумат уйидан олиб қўйилган пул маблағларини талон-торож қилишда ҳам айбланмоқда.