Тергөөнүн версиясына ылайык, Ачилов 2022-жылдын февралынан 2024-жылдын март айына чейин Новосибирсктеги соода борборлорунда Украинадагы согуштун "максаты, ыкмалары жана анын жүрүшү жөнүндө атайылап жалган сөздөрдү айткан", ошондой эле Орусиянын президенти менен өкмөтүнүн "атайын аскердик операция өткөрүү чечимин айыптаган". Мындан тышкары ал коомдук жайларда "бир нече жолу сөгүнүп, орус аялдарын кемсинткен".
Сотто Ачилов Тажикстандан Орусияга 2012-жылы барып, 2021-жылы туруктуу жашоого укук алып, 2024-жылы февралда орус жарандыгын алуу үчүн документтерин тапшырганы айтылды. "Ошондой эле анын үй-бүлөсү – аялы менен балдары 2022-жылдын ноябрынан бери Орусиянын аймагында мыйзамсыз жашап жүргөнү аныкталды", – деп жазылган соттун токтомунда.
Орусиянын Тергөө комитети билдиргендей, Ачиловго каршы кылмыш иши быйыл марттын аягында козголгон. Мекеменин маалыматына караганда, ал Новосибирсктеги базарда иштеп, "экстремисттик мүнөздөгү сөздөрдү айтып, башка бир нече мыйзамсыз аракеттерге барган".
Тергөө комитетинин маалыматы боюнча, 2022-жылдын февралынан 2024-жылдын январына чейин "Орус армиясы жөнүндө жалган маалымат таратуу" беренеси боюнча жалпысынан 273 кылмыш иши козголгон. Мындан тышкары "Орус армиясынын кадырын кетирүү" беренеси менен дагы 81 кылмыш иши ачылган.
Бул беренелер боюнча козголгон кылмыш иштери боюнча өз алдынча санак жүргүзгөн "ОВД-Инфо" укук коргоо долбоорунун маалыматына ылайык, 2022-жылдын март айынан 2024-жылдын январына чейин "Орус армиясы жөнүндө жалган маалымат таратуу" беренеси боюнча 282 кишиге, "Орус армиясынын кадырын кетирүү" беренеси боюнча 177 кишиге кылмыш иши козголгон.