Ссылки доступа

Байден Украинага F-16 учактары берилбей турганын билдирди


F-16 согуштук учагы
F-16 согуштук учагы

АКШнын президенти Жо Байден Вашингтон Киевге F-16 согуштук учактарын бербей турганын билдирди. Бул тууралуу AFP агенттиги кабарлады.

Кийинчерээк АКШнын Улуттук коопсуздук кеңешинин расмий өкүлү Жон Кирби Байдендин бул билдирүүсү боюнча пикирин айтып, Вашингтон Киевге жетиштүү курал-жарак берип жатканын билдирди.

26-январда Байдендин коопсуздук маселелери боюнча кеңешчиси Жон Файнер Вашингтон Киевге F-16 учактарын берүү ыктымалдыгын жокко чыгарбай турганын айткан. Ошол эле күнү Пантагондун өкүлү Сабрина Сингх журналисттерге " F-16 учактарын жеткирүү маселеси күн тартибинен алынбай турганын" ырастаган. Ага чейин АКШ Украинага согуштук учактарды берүү мүмкүн эмес экенин билдирип келген.

Киевге согуштук учактарды берүү маселеси өткөн жумада Украинага батыш өндүрүшүндөгү танктарды жеткирүү чечими кабыл алынгандан кийин активдүү талкуулана баштады. Буга чейин украин аскерлери аларга 180 согуштук учак керек экенин билдиришкен.

Ал ортодо Украинага өздөрүнүн F-16 учактарын берүүгө даяр экенин Нидерланд менен Польша билдирди.

Германиянын канцлери Олаф Шольц абалдын мындан да курчуп кетишине жол бербөө керектигин белгилеп, Украинага согуштук учактарды бербей турганын айтты.

The Telegraph басылмасынын маалыматына караганда, Улуу Британия согуштук учактарды орус аскерлери Украинанын аймагынан чыгып кетсе берет.

Күн мурун Нидерландга барган Франциянын президенти Эммануэль Макрон Украинага батыш өндүрүшүндөгү согуштук учактарды берүү ыктымалдыгын жокко чыгарган эмес. "Негизинен эч нерсеге тыюу жок", – деген Макрон.

Ошол эле маалда ал учактардын берилиши абалды курчутпашы зарыл экенин жана алар Орусиянын аймагына соккуларды жасоо үчүн колдонулбашы керектигин кошумчалаган.

Орусия кол салган 2022-жылдын февраль айынан бери Украина өзүнүн согуштук авиациясынын дээрлик баарын жоготту. Көз карандысыз Oryx долбоору Украинанын 55 учагы жана 25 тик учагы жок кылынганын билдирген. Бирок долбоордун баяндамасына жок кылынганы сүрөт же видео менен ырасталган техникалар гана кирген.

XS
SM
MD
LG