Беларус Озарбайжонга 2018-2022 йилларда, жумладан Қорабоғдаги можаро пайтида ҳам, қурол-яроғ етказиб берган ва ҳарбий кўмак кўрсатган.
Бу ҳақда Беларусга оид ва сиздирилган дипломатик ва ҳарбий ҳужжатларга таяниб Politico нашри хабар бермоқда.
Нашрнинг ёзишича, Минскнинг Озарбайжонга ёрдами эски артиллерия қуролларини модернизация қилиш ҳамда радиоэлектрон курашда ишлатиладиган янги жиҳозларни ва дронларни етказиб бериш тарзида бўлган.
Беларус ва Арманистон Россия етовидаги Коллектив Хавфсизлик Шартномаси Ташкилотига аъзолардир. Бу ташкилотга, шунингдек, Қозоғистон, Қирғизистон ва Тожикистон ҳам киради.
Тоғли Қорабоғдаги мағлубиятдан сўнг Арманистон КХШТ тадбирларида иштирок этмай қўйди. Пашинян Тоғли Қорабоғдаги қуролли тўқнашув чоғида “қўл қовуштириб ўтиргани” учун Москвани кескин танқид қилган эди. Бош вазирга кўра, бу КХШТ блокининг самарасизлигини кўрсатган. Айни пайтда Пашинян Россиянинг Арманистондаги ҳарбий базасини ёпиш масаласи “кун тартибида эмас”лигини айтган.
КХШТ котибияти Ереван ташкилотга аъзоликни тўхтатиш тўғрисида ариза топширмагани ва, афтидан бу ерда гап Арманистоннинг КХШТ тадбирларида иштирок этмаслиги ҳақида бораётганини қайд этган.
2023 йил ноябрида Пашинян КХШТнинг Минскдаги саммитида иштирок этишдан бош тортганди. Ўша пайтда у Арманистон хавфсизлик соҳасидаги “алоқаларини диверсификация қилиш” ниятида эканини, чунки Ереваннинг “ҳозирги ҳамкорлари” унга қурол-аслаҳа ва ўқ-дори етказиб бера олмаётганини билдирган эди.
2024 йилнинг июнида эса Арманистон КХШТдан чиқишга тайёргарлик кўришни бошлаган. Бу ҳақда Арманистон бош вазири Никол Пашинян парламентдаги муҳокамаларда маълум қилди.
Ушбу баёнотдан сўнг Пашинян бевосита Александр Лукашенкони Тоғли Қорабоғдаги можаро вақтида Озарбайжонни қўллаб-қувватлаганликда айблади. Шундан сўнг Ереван ўз элчисини Минскдан, Минск эса ўз элчисини Еревандан чақириб олди.