Кемерово шаҳрида иккита трамвайнинг тўқнашуви оқибатида 102 киши, жумладан, беш нафар бола жароҳат олди. 78 нафар одам касалхонага ётқизилди, деди Россия соғлиқни сақлаш вазири ёрдамчиси Алексей Кузнецов.
Уч нафар одамнинг аҳволи оғир, бир киши вафот этган.
6 июнь куни эрталаб трамвай бошқарувни йўқотиб, тепаликдан тезлик билан туша бошлади. Айрим йўловчилар кескин бурилишда салондан отилиб кетган. Алалоқибат, трамвай бошқа трамвай билан тўқнашиб ағдарилган. Дастлабки маълумотларга кўра, ҳодисага тормоз тизимининг носозлиги сабаб бўлган.
Тармоқларда тарқалаётган Кемерово трамвай компанияси ходимларидан бирининг овозли хабарида айтилишича, трамвай рейсга чиқишдан олдин носоз бўлган, унинг тормозлари ишламай қолган, лекин уни барибир рейсга чиқариб юборишган".
Шаҳар ҳокими Дмитрий Анисимовнинг айтишича, Кемеровода трамвайларнинг фойдаланиш муддати 90 фоизга етган, уларнинг ёши 40 йилдан ошган.
Ҳодиса бўйича жиноят иши қўзғатилган..