Бул тууралуу Eurasianet.org агенттигинин суроолоруна БУУнун өкүлү кат түрүндө жооп берип жатып билдирди.
Басылманын белгилешинче, расмий Ташкент ЮНЕСКОнун кайрылууларына көңүл бурбай жатат.
ЮНЕСКОнун өкүлү Өзбекстан Бухарадагы курулуштун башкы планын азырынча бере электигин билдирди.
«Өзбек бийлиги убадаларды одоно бузуп, жыл башында Бухаранын тарыхый бөлүгүнө жанаша жайгашкан буфердик зонада имараттарды бузуп баштаган. Бул маданий мурастар менен алектенген активисттердин нааразычылыгын жараткан», - деп белгилейт басылма.
Өзбек өкмөтү 326 000 чарчы метр аянтты ээлеген ондогон эски имараттарды бузуп, “Бокий Бухара” долбоорун ишке ашырууну пландап жатат. Бошогон тилкелерге миңдеген туристтерди кабыл алууга ылайыкталган көп кабаттуу мейманканалар курулат.
8-февралда ЮНЕСКО Өзбекстандын бул долбоор боюнча пландарын тактоо үчүн расмий Ташкентке кайрылуу жолдогон, бирок азырынча жооп ала элек.
Бухара 1993-жылы ЮНЕСКОнун Бүткүл дүйнөлүк мурастар тизмесине киргизилген.
Анткен менен өзбек бийлиги Бухаранын инфраструктурасы совет доорунан калган жана туристтердин муктаждыктарын канааттандыруу үчүн жакшыртылышы керек деп эсептейт.
Бул боюнча өлкө жетекчилиги азырынча эч кандай билдирүү жасай элек.