60 жаштагы Черчесов – СССР, КМШ жана Орусия курама командаларынын мурдагы дарбазачысы. Карьерасынын көбүн Москванын "Спартак" жана Австриянын "Тироль" футболдук клубдарында өткөргөн. Машыктыруучу катары Орусиянын курамасын башкарып, Австрияда, Польшада жана Венгрияда иштеген.
Черчесов машыктырган акыркы команда Будапешттин "Ференцварош" клубу болду. Ал бул команда менен Венгриянын чемпионатын эки жолу катары менен утуп, өлкөнүн кубогун алган. Былтыр июлда клуб Чемпиондор лигасынан четтеп калгандан кийин иштен алынган.
Казакстан футбол федерациясынын билдирүүсүндө машыктыруучу менен түзүлгөн келишимдин шарттары жөнүндө жазылган эмес. Орусиянын "Спорт-Экспресс" басылмасынын маалыматына караганда, Черчесов Казакстан курамасын 2026-жылы АКШда, Канадада жана Мексикада өтө турган дүйнөлүк чемпионаттын тандоо оюндары аяктаганга чейин башкарат. Андан кийин келишим дагы эки жылга узартылышы мүмкүн.
Казакстандын футбол боюнча улуттук курама командасын буга чейин машыктырып келген орусиялык Магомед Адиев өткөн жумада кызматтан алынган.