"Вагнер" хусусий ҳарбий компанияси Африкага юбориш учун жангариларни ёллашни қайта бошлади. Улар янги қўмондон Антон Елизаров раҳбарлигида хизмат қилади.
"Вагнер"нинг расмий телеграм канали бир ой ичида ишга қабул ҳақида 20 маротаба эълон берди. "Вагнер" Африкага жангариларни ёллашни бир йил аввал, 2023 йил март ойида Украинадаги урушга жангариларни ёллаш бошлагани муносабати билан тўхтатиб турган эди.
Энди эса, "Вагнер"га алоқадор канал ва чатлардаги хабарларга кўра, Ғарбий Африкадаги Мали давлатидаги операцияларда қатнашиш учун жангарилар қидирилмоқда. Уларда айтилишича, Малида ҳокимиятга келган полковник Ассими Гоита вагнерчилар билан шартномани узайтирган.
Ишга нафақат россияликлар, балки беларуслар ҳам жалб қилинмоқда. Эълонлар асосан пиёда аскарликка ва дрон операторлигига оид. Бу лавозимларга 22 ёшдан 50 ёшгача бўлган эркаклар қидирилмоқда, уларга олти ойлик шартнома, 240 минг рубль маош ва ҳаётни суғурталаш ваъда қилинмоқда.
Рекрутёрларнинг бири муҳтамал жангари ниқобида суҳбатлашган "Вёрстка" мухбирига айтишича, Африкада жанг қилишни истаётганлар бисёр. "Ҳеч ким Украинада ўлиб кетишни истамаяпти. Лекин Африка бу борада тинчроқ. Об-ҳавоси ҳам маъқулроқ", дея қўшимча қилган у.
"Вагнер" ХҲК Россиянинг норасмий қуролли тузилмаси бўлиб, унга илгари Владимир Путинга яқин бўлган бизнесмен Евгений Пригожин томонидан асос солинган. Гарчи ёлланма жангарилик Россия қонунчилигида тақиқланган бўлса-да, "Вагнер" бемалол Сурия ва Украинадаги урушга одам ёллаган. Қуролли қўзғолонга уриниш ва Пригожиннинг ўлимидан сўнг "Вагнер" Мудофаа вазирлигига бўйсундирилган. ХҲК фаолияти Африкада давом этмоқда,бироқ эндиликда бу фаолият ҳақида маълумотлар кенг ёритилмаяпти.
"Вагнер" жангариларни Африкага қайта ёлламоқда
Улар янги қўмондон Антон Елизаров раҳбарлигида хизмат қилади.