Маълум нест, ки Киев кадом нақшаҳоро тағйир додааст, аммо манбаи телевизион гуфтааст, нашри ҳуҷҷатҳо Пентагонро ба коҳиш додани гардиши ҳуҷҷатҳои муҳим водор кардааст.
Вазорати мудофиаи ИМА ба санҷиши воқеӣ будани ҳуҷҷатҳое идома медиҳад, ки дар интернет нашр шуданд. Ҳуҷҷатҳои мазкур "зоҳиран маълумот махфӣ ва махсусан махфиро дар бар мегиранд". Вазорат баҳогузорӣ хоҳад кард, ки паҳн шудани ҳуҷҷатҳо ба амнияти миллии ИМА ва ҳампаймононаш чи таъсире мерасонад. Муовини сухангӯи Пентагон Сабрини Сингх гуфт, вазорати адлияи ИМА таҳқиқ мекунад, ки ин санадҳо чи гуна дастраси умум шудаанд.
Санадҳои махфӣ, ки ба ҳамлаи ҷавобии Украина ва ирсоли аслиҳа ба Украина, теъдоди неруҳо, Шарқи Наздик ва Чин рабт доранд, моҳи март дар интернет нашр шуданд.
Дар санадҳо омодагӣ ва мусаллаҳсозии дастаҳое шарҳ дода шудааст, ки Украина онҳоро барои ҳамлаи ҷавобӣ истифода хоҳад кард.
Бархе аз мансабдорон дар Пентагон ба расонаҳо гуфтаанд, ки санадҳо метавонанд воқеӣ бошанд.
Дар маъмурияти президенти Украина гуфтанд, санадҳо "дасткорӣ" шудаанд. Дар Киев ҳамчунин аз эҳтимол дур намедонанд, ки ин санадҳо моли амалиёти махсуси Москва бошанд. Москва дар шарҳи нашри санадҳо гуфт, "камтарин шубҳае боқӣ намондааст", ки ИМА ва НАТО ба таври мустақим ва ғайри мустақим дар низоъи Украина ворид шудаанд.