Шанба куни Оқ Уй раҳбари Нью-Йорк ва Нью-Жерсида сайловолди кампаниясига маблағ йиғишга қаратилган бир қатор тадбирларга ташриф буюрди ва унда CNN телеканалида президентлик дебати пайтидаги ўз чиқишини ҳимоя қилиб чиқди. Байден ушбу кеча унинг учун омадли бўлмаганини тан олди. "Дарвоқе, Трамп учун ҳам шундай бўлди", - дея қўшимча қилди демократ сиёсатчи. Айни пайтнинг ўзида Жо Байден бўлғуси сайловларни ютиш ниятида эканлигини қайд этди.
Пайшанба кунги биринчи президентликка номзодлар баҳсларида 81 ёшли давлат раҳбарининг чиқиши кўплаб демократларда ташвиш уйғотди, деб ёзди “Америка овози”. Қайд этилишича, Байден ҳар доим ҳам ўз фикрини охирига етказолмади, ўта қийинчилик билан ибораларни қидириб топди, жавобларда адашди. Унинг ўзини тутиши жума куни The New York Times таҳририятини амалдаги президентни пойгадан чиқиши кераклиги ва унда қолиш “ақлсиз авантюра” бўлиши мумкинлиги борасида баёнот беришга мажбур этди.
Янграган бундай иддаоларга жавобан Жо Байден ташвишларни тушуниши, аммо “жон жаҳди билан курашажаги” ни айтди. АҚШнинг биринчи хоними Жилл Байден жума куни дебатлардан кейин ўз эри билан шахсий суҳбатда бўлган гапларни тарафдорлари билан ўртоқлашди. Байденнинг айтишича, “у нима бўлганини билмайди, аммо у ўзини яхши ҳис қилмаган”. Аввалроқ Байденнинг сайловолди штаби вакиллари президент дебатга совуққонлик билан чиққанини айтишди.
Байден кампаниясининг вакиллари Дональд Трамп билан сайловолди учрашуви штаб истагандек ўтмаганини тан олишди, бироқ Оқ уй раҳбари ҳозир жойини бошқа номзодга бўшатмоқчи эмас. Дональд Трампнинг ўзи эса баҳслардан бир неча соат ўтиб тарафдорларига бўлиб ўтган дебатни ўз кампаниясининг “катта ғалабаси” деб таърифлади. “Жо Байденнинг муаммоси унинг ёшида эмас”, - дер экан 78 ёшли Трамп, муаммо Байденнинг “ўта ноқобиллигида” дея қўшимча қилди. Трамп Байденнинг лаёқатсизлиги ҳақида биринчи марта гапираётгани йўқ. Ўз навбатида, Байденнинг тарафдорлари орасида собиқ президент Трамп Америка демократияси учун таҳдид туғдиради, қабилидаги қарашлар бор.
АҚШдаги навбатдаги президентлик сайлови 5 ноябрга режалаштирилган. Собиқ президент Дональд Трамп республикачилардан президентликка кўзда тутилаётган номзод. Байденнинг номзодини август ойида демократлар қурултойи расман тасдиқлаши керак.