Ба гуфтаи масъулони МАГАТЭ, коршиносон се иншооти Украина - Пажӯҳишгоҳи ҳастаӣ дар Киев, Корхонаи маъдантозакунии Жёлтии Водӣ ва Корхонаи ҷанубии мошинсозӣ дар Днепрро аз назар гузарондаанд.
Ин бозрасӣ бо дархости фаврии Киев пас аз он сурат гирифт, ки мақомоти Русия гуфтанд, Украина барои таркондани як "бомбаи ифлос" дар қаламрави худ омодагӣ мегирад. Маскав ҳамчунин иддао кард, ки раҳбарияти Украина қасд дорад, масъулияти истифодаи бомбаро бар дӯши Русия гузорад.
Украина ва кишварҳои ғарбӣ иддаои Маскавро дурӯғ хонданд. Президенти Украина Владимир Зеленский гуфт, ягона шахсе, ки метавонад дар бораи истифодаи силоҳи ҳастаӣ дар Аврупо фикр кунад, президенти Русия Владимир Путин аст.