Партиялар коалиция түзүүгө жана ага башка оппозициялык күчтөрдү да тартууга макулдашты. 2014-жылы аскердик төңкөрүш менен бийликке келген Тайланддын азыркы премьер-министри Прают Чан-Очанын партиясы 36 гана орунга ээ болду.
“Алга карай” кыймылы парламентте 152 мандатка ээ болду. Партия өкмөттү, экономиканы, армиянын ролун жана монархияны коргогон мыйзамдарды кескин өзгөртүүнү жактайт.
2020-жылы студенттер активдүү катышкан нааразылык акцияларында дал ушул талаптар жаңырган. Анда “Алга карай” кыймылынын өкүлдөрү митингге лидерлик кылышкан.
"Алга карай” кыймылынын төрагасы, 42 жаштагы Пита Лимчароенрат өлкөнүн жаңы премьер-министри болууга даяр экенин билдирди.
Ал Твиттердеги баракчасына: "Биздин кыялдарыбыз, үмүттөрүбүз бир. Сүйүктүү Тайландыбыз азыркыдан жакшы болоруна ишенебиз. Эгер бүгүн бул багытта иштей баштасак, өзгөрүү мүмкүн", - деп жазды.
Тайлар Прают Чан-Очанын өкмөтүн экономиканын алсырашына, COVID-19 пандемиясына натыйжасыз жооп кайтарууга жана демократиялык реформаларга тоскоолдук кылууга айыптоодо. Прают Чан-Оча шайлоодо жеңилгенин мойнуна алды.