Эл аралык байкоочулар шайлоонун уюштурулушу демократиялык эрежелерге шайкеш болуп, жарандар талапкерлерди эркин тандай алышканын белгилешти.
"Ошол эле маалда шайлоо өнөктүгү учурунда оппоненттерин басмырлаган сөздөр айтылды. Мамлекеттик ЖМКлар бир жактуу мамиле кылып, сөз эркиндиги чектелди. Бул талапкерлер үчүн бирдей шарттар түзүлбөгөн жана Эрдоганга артыкчылыктар берилген абалды жаратты", – деп жазылган баяндамада.
Ал арада Түркиядагы президенттик шайлоонун жыйынтыгы өлкөнүн улуттук валютасы – лиранын курсуна терс таасир этти. Дүйшөмдү күнү эртең менен Эрдоган жеңишке жеткени жарыялангандан кийин лиранын долларга карата курсу рекорддук – 20,05 лирага түшүп калды. Morgan Stanley банкы эгер Эрдоган акча-насыя саясатын өзгөртпөсө, жыл соңуна чейин түрк валютасынын курсу 29% төмөндөп, 1 АКШ доллары 28 лирага барабар болуп калышы мүмкүн экенин эскертүүдө.
"Эрдогандын жеңиши бир дагы чет өлкөлүк инвестор үчүн жакшы эмес. Өтө жогорку инфляция, төмөнкү пайыздык чендер жана таза валюталык резервдердин жоктугу – бардык активдерге таасир эте турган оор каатчылыкка алып келет", – деди Bloomberg агенттигине эксперт Хаснайн Малик.