"Демаркация умуман олганда нимани англатади? Бу Арманистон бошланадиган жойни топишни англатади. Арманистон қаердан бошланиб, қаерда тугашини мендан ҳам яхши биласиз”, деди Арманистон контурлари туширилган моделни намойиш қилган Пашинян.
Унинг таъкидлашича, Арманистон ҳукумати “урушнинг олдини олиш” мақсадида Арманистон ва Озарбайжон ўртасидаги чегарани делимитация ва демаркация қилиш жараёнини бошлашга қарор қилган. Энди бу жараён амалий босқичга кирмоқда. Бош вазирнинг тушунтиришича, махсус комиссиялар “Арманистон қаердан бошланишини ҳал қилиши керак ва бу ер давлат чегарасига айланиши керак”.
Учрашув иштирокчиларининг Азатутюн радиосига айтишича, Никол Пашинян чегара қишлоқлари аҳолисини ташвишга солаётган саволларга аниқ жавоб бермаган, аммо барча фикрлар инобатга олинишини ваъда қилган.
Тавуш вилояти маъмурияти раҳбари Нвер Бегларян огоҳлантиришича, чегарада жойлашган Воскепар, Баганис ва Воскеван қишлоқлари ҳамда Ноемберян шаҳри аҳолиси минтақа аҳоли пунктлари Озарбайжонга берилса йўлларни тўсиб ўзини ўзи ҳимоя қилишга тайёрдир.
Расмий Боку аввалроқ Тавуш ва Газах вилоятлари чегарасидаги тўрт қишлоқ ҳудудини қайтаришни талаб қилган. Пашиняннинг сўзларига кўра, Озарбайжон даъво қилган тўрт қишлоқ – Баганис Айрум, Ашаг Аскипара, Хейримли ва Гезилҳажили де-юре Арманистон ҳудудидага кирмайди.
Чегарадаги арман қишлоқлари аҳолиси “Қорабоғдаги воқеалар бу ерда ҳам қайтарилишидан” хавотирда.
Халқаро ҳамжамият томонидан Озарбайжон ҳудуди деб тан олиниб келинган Тоғли Қорабоғнинг катта қисми 30 йилдан кўпроқ вақт мобайнида тан олинмаган Қорабоғ республикаси назорати остида бўлиб келган. 2022 йилнинг 19 сентябрида Озарбайжоннинг муваффақиятли ҳарбий ҳаракатлари натижасид охир-оқибат Тоғли Қорабоғнинг бутун ҳудуди Озарбайжон назорати остига қайтарилди.
Озарбайжон билан чегарани демаркация қилиш бошланганини Никол Пашинян чегарадаги қишлоқлар аҳолиси билан учрашув чоғида маълум қилди, деб хабар бермоқда Озодлик радиосининг арман хизмати.