Ин муроҷиатномаро "Медуза" ба нашр расонда, дар он рӯзноманигорон аз мудири ширкати "Apple" Тим Кук, муассиси "Telegram" Павел Дуров, соҳиби "Твиттер" Илон Маск, мудири "Meta" Марк Зукерберг, раҳбарони "YouTube, "Google", "Microsoft" ва "Linkedin" даъват кардаанд.
Ба гуфтаи муаллифони муроҷиатнома, мақомоти Русия ба дубора президенти ин кишвар интихоб шудани Владимир Путин дар соли 2024 омодагӣ мегиранд ва интизор меравад, онҳо дар арафаи интихобот “ба ҳама гуна изҳороте, ки хилофи гузинаи расмии Кремл аст, таҳаммулнопазирӣ нишон диҳанд".
Онҳо саркӯбҳо алайҳи рӯзноманигоронро, ки пас аз ҳамлаи Русия ба Украина дар моҳи феврали соли 2022 шиддат гирифтааст ва баста шудани шабакаҳои иҷтимоиву расонаҳои зиёдро дар Русия ёдовар шудаанд.
"Танҳо ду платформаи бузург - "Telegram" ва "YouTube" то ҳол қисман аз ин поксозӣ наҷот ёфтаанд. Инҳо танҳо фазои иттилоотӣ дар ихтиёри рӯзноманигорони рус боқӣ мондаанд, ки кушиш мекунанд, ҳамватанони худро дар бораи воқеияти ҷанге огаҳ созанд, ки Путин аз номи онҳо шуруъ кардааст", - афзудаанд онҳо.
Зери муроҷиатнома раҳбарони "Медуза", ,The Bell , "Дожд", "Медиазона", Republic, "Вёрстки", "Важных историй", "Эха" ва расонаҳои мустақили дигари Русия имзо гузоштаанд.