Санду рӯзи душанбе дар як нишасти хабарӣ дар шаҳри Кишинёв ҷузъиёти нақшаи Русияро барои ноором кардани вазъ дар Молдова ошкор кардааст. Ӯ афзуда, ки ин нақшаро Хадамоти махсуси Украина ҳафтаи гузашта дар ихтиёри мақомоти Молдова гузоштааст.
Президенти Молдова мегӯяд, тибқи нақша, ҷонибдорони Русия зери чатри эътирозҳои неруҳои мухолиф ба бинои ниҳодҳои давлатӣ ҳамла карда, бояд одамонро гаравгон гиранд ва ба ин кор афроди тамриндида аз хориҷ, аз ҷумла аз Русия, Белорус, Сербистон ва Черногория низ ҷалб шуда, аз дохил неруҳое кумак мекардаанд.
Ба назари Санду, ҳадафи Русия боздоштани ҳамгироии аврупоӣ ва истифодаи Молдова дар ҷанг зидди Украина аст. Москва изҳороти президенти Молдоваро то ҳол шарҳ надодааст.