Тожикистоннинг Фархор туманида 25 май куни содир бўлган сел Сурхоб қишлоғини деярли бутунлай ювиб кетди. Сел эрта тонгда содир бўлгани учун одамлар деярли ҳеч нарсасини қутқара олмади. Маҳаллий турғун Қурбонгул Алихонованинг айтишича, у фақат ҳужжатларни олишга улгурган.
"Эрталаб ёмғир ёға бошлади, кейин сел тушди - ҳаммаси ярим соат ичида содир бўлди. Ҳужжатларни олишга улгурдим, холос” дейди Қурбонгул Алихонова.
Қишлоқ аҳолиси қишлоқ четидаги тоғ ёнбағрида бошпана топган, бироқ сел аксар уйларни яроқсиз ҳолга келтирган. Йўллар ҳам ювилиб кетилган.
Ҳокимият ва маҳаллий аҳоли табиий офат оқибатларини бартараф этиш ишларини бошлаб юборган. Селдан зарарни аниқлаш учун махсус гуруҳ тузилган. Катта эҳтимол билан, махсус гуруҳнинг хулосасидан кейингина кўпроқ ёрдам кўрсатилади, аммо селдан зарар кўрган аҳолининг айтишича, ҳозирча улар яшашига деярли жой йўқ.
Аввалроқ айни сел 12 ёшли қизни оқизиб кетгани ҳақида хабар берилган эди. У яйловда отасига мол боқишда ёрдам бераётган бўлган.
Фавқулодда вазиятлар қўмитаси хабар беришича, қизнинг жасади қўшни қишлоқдан ўтаётган сел оқимидан топилган.
Сурункали ёғингарчилик сабабли Тожикистоннинг кўплаб вилоятларида сел ва кўчкилар кузатилмоқда. 200 дан ортиқ уй ва биноларни сув босган, йўллар ва кўприклар ювиб кетилган.
Хусусан, 26 май куни Шаҳринав туманида 50 дан ортиқ уй-жой сув остида қолган, иккита кўприк вайрон бўлган, 20 гектарга яқин пахта ва 7 гектар картошка майдонларини сув босган. Файзобод туманида катта кўчки хавфи деб қишлоқ аҳолиси хавфсиз жойларга кўчирилишига тўғри келди. Табиий офатдан катта зарарлар Хатлон вилояти ва Рашт водийсида ҳам қайд этилган.
Тожикистоннинг Фархор туманида 25 май куни содир бўлган сел Сурхоб қишлоғини деярли бутунлай ювиб кетди.