Анда эл аралык укук жагынан алганда, Орусия колдонуп келе жаткан "БУУга мүчө өлкө" макамы жөнүндөгү маселе 1991-жылдын декабрында СССР тарагандан бери жөнгө салынбай келет. "Орусия БУУнун Коопсуздук кеңешинин туруктуу мүчөсү деген макамды Улуттар Уюмунун белгиленген уставын айланып өтүп алган. Өлкө бул макамга президент Борис Ельциндин БУУнун башкы катчысына жөнөткөн жөнөкөй эле катынын негизинде ээ болуп калган. БУУнун уставында, анын ичинде Коопсуздук кеңешинин туруктуу мүчөлөрү тизмектелген беренеде Орусиянын атылышы жок", – деп жазылган украин ТИМинин билдирүүсүндө.
Мындан тышкары билдирүүдө БУУнун уставына ылайык, уюмдун ишине тынчтыкты жактаган өлкөлөр гана катыша алары белгиленип, Орусия болсо учурда Украинага каршы агрессиялык согуш жүргүзүп жатканы жазылган.
Азырынча Орусия жана БУУга мүчө башка өлкөлөр украин ТИМинин бул билдирүүсүнө эч кандай реакция кыла элек. Буга чейин Батыш өлкөлөрүнүн, анын ичинде АКШнын өкүлдөрү Орусияны Коопсуздук кеңешинен чыгаруунун юридикалык механизмдери жок экенин бир нече жолу билдиришкен.
БУУга Украина менен Беларус СССРдин курамындагы УССР жана БССР республикалары катары негиздөөчү өлкөлөр болуп кирген. Орусиядан башка мурдагы советтик республикалар БУУнун курамына анын уставында каралган процедуралар боюнча кабыл алынган.
"Көз карандысыз Мамлекеттердин Шериктештигинин (КМШ) колдоосу менен СССРдин БУУдагы, анын ичинде Коопсуздук кеңешиндеги мүчөлүгүн Орусия Федерациясы улантат. Буга байланыштуу БУУдагы СССР деген аталышты Орусия Федерациясы деп өзгөртүүңүздү өтүнөм", – деп жазылган Ельциндин 1991-жылы декабрда БУУнун башкы катчысына жолдогон катында. БУУда бул сунушка эч кандай каршылык болгон эмес. Ошол эле маалда Орусияны уюмга кабыл алуу боюнча формалдуу добуш да берилген эмес.
БУУнун уставына ылайык, "Уставдагы принциптерди системалуу түрдө бузган өлкө Коопсуздук кеңешинин сунушу менен уюмдун Башкы ассамблеясынан чыгарылышы мүмкүн. Бирок иш жүзүндө мындай себеп менен бир да өлкө БУУдан чыгарыла элек.
СССР Финляндияга кол салганы үчүн 1939-жылы Улуттар лигасынын курамынан чыгарылган. Бирок БУУга салыштырмалуу ал уюмдун тартиптери башкача болгон.