Майдын башында Минск шаарындагы сот Протасевичти Беларуста бийликти басып алуу кутумуна жана массалык башаламандык уюштурууга айыптуу деп таап, сегиз жылга эркинен ажыраткан. Мунун алдында ага экстремисттик топко жетекчилик кылган деген айып да тагылган.
Басылманын иши боюнча күнөөлөнүп жаткан дагы эки киши – Степан Путило 20 жылга жана Ян Рудик 19 жылга сыртынан кесилген.
NEXTA каналы 2020-жылы Александр Лукашенкого каршы нааразылык акцияларын чагылдырганда кеңири таанылган. Негиздөөчүлөрү - Степан Путило жана Роман Протасевич экстремисттик ишмердикке аралашкан адамдардын тизмесине киргизилгенден кийин Беларустан чыгып кетишкен.
2021-жылдын 23-майында Протасевич сүйлөшкөн кызы София Сапега менен Афиныдан Вилньюска баратканда, Ryanair авиакомпаниясынын учагы күчтөп Минскиге кондурулган. Экөө кармалып, Сапега алты жылга жатак абакка кесилген.
Ал эми Протасевич мурдагы санаалаштарын сындаган интервьюларды бере баштаган жана күнөөсүн моюнга алган. Көп узабай бийлик менен кызматташканы белгилүү болгон.