Қонун қабул қилинса, фақат ҳукумат комиссиясининг махсус рухсати билан ҳайвонларга эгалик қилиш мумкин бўлади. Эронга қуён ва тошбақаларгача бўлган ҳар қандай ҳайвонларни олиб кириш учун тахминан 800 доллар жарима солинади. Улар шарқ мамлакати учун қабул қилиб бўлмайдиган "ғарблашув рамзи" ҳисобланади.
Эрон ветеринария ассоциацияси президенти ва қонун лойиҳасининг мухолифи доктор Паям Моҳебийнинг сўзларига кўра, бу борадаги баҳслар ўн йилдан кўпроқ вақт олдин бошланган. Кейин қонун лойиҳаси вақти-вақти билан унинг муҳокамасига қайтарилган бўлсада, маъқулланмади. Бироқ Эронда консерватив кайфиятнинг ҳозирги кучайиб бораётгани фонида қонун лойиҳаси яқин орада маъқулланиши мумкин.
Қонун лойиҳасидан зарар кўрган ҳайвонлар рўйхатига нафақат итлар, балки мушуклар ва бошқа кўплаб турлар ҳам киради.
BBCнинг Теҳрондаги мухбири, шунингдек, Эрон шаҳарларида боғлар ва бошқа жамоат жойларида итларни сайр қилгани учун ҳибсга олиш ҳолатлари кўпайганини хабар қилади. Ҳибсга олинганлардан ҳайвонлар мусодара қилинади.
Оммабоп стереотипдан фарқли ўлароқ, Қуръон мусулмонларга агар улар фойдали бўлса - масалан, қўриқчи ёки овда ёрдамчи сифатида итларни сақлашни тақиқламайди. Мусулмон илоҳиётшунослари итнинг тупуригини ва сочларини маросимга кўра ҳаром деб ҳисоблайди ва итларни уйда эмас, балки ҳовлида сақлашни тавсия қилади. Исломда бошқа ҳайвонлар - мушуклар, қушлар, ҳамстерлар, қуёнларни сақлаш тақиқланмаган. Мушуклар Муҳаммад (С.А.В) пайғамбарнинг севимли ҳайвонлари бўлган.
1979 йилдаги "ислом инқилоби"гача Эрон уй ҳайвонларини боқиш бўйича энг илғор шарқ давлатларидан бири бўлган. У Яқин Шарқда биринчи бўлиб ҳайвонларни ҳимоя қилиш қонунларини қабул қилди; 1948 йилда бу ерда уларга риоя қилишни назорат қилувчи биринчи давлат ташкилоти пайдо бўлди. Ҳатто қирол оиласи аъзоларининг ҳам итлари бор эди. Дунёдаги энг машҳур мушук зотларидан бири - форс мушуги- Эронда етиштирилган. Теҳронда бу зотнинг тарихига бағишланган музей мавжуд.