RU зонасындагы жүздөгөн веб-сайттар, мобилдик тиркемелер жана сервистер нече саат бою ачылган жок. Анын ичинде Яндекс, Сбербанк, ВКонтакте, Ozon кызматтары, ошондой эле Мамлекеттик кызматтар порталы да бар.
Интернеттин үзгүлтүккө учураганы тууралуу даттануулар өлкөнүн бардык аймактарынан гана эмес, чет өлкөлөрдө жайгашкан колдонуучулардан да түшүп жатты.
Орусиянын Санариптик өнүктүрүү министрлиги мүчүлүштүк DNS протоколун кеңейтүүгө байланыштуу техникалык көйгөйдөн улам келип чыкканын маалымдады. Министрлик кыска мөөнөттө орус сайттарына кирүү мүмкүнчүлүгүн калыбына келтирүүгө убада берген.
Бир катар эксперттер орус бийлиги өлкөдөгү бардык колдонуучуларды DNS улуттук серверине өткөрүү планын көптөн бери жарыялап келгенин белгилешип, азыр дал ошол жараян ишке ашырылып жатканын божомолдошууда.