15-апрелде эртең менен Тбилисиде жана Грузиянын башка шаарларында "чет элдик агент" мыйзамына каршы нааразылык акциялары башталган. Тартип коргоочулар менен демонстранттар ортосунда кагылышуу катталып, бир нече адам кармалган.
Ички иштер министрлигинин маалыматы боюнча, "митингчилердин зомбулук аракеттеринин натыйжасында" бир полициячы жарадар болду. Ага медициналык жардам көрсөтүлдү.
Митингдин катышуучулары "майда бейбаштык жана бийлик өкүлдөрүнүн талаптарына баш ийбөө" үчүн кармалышкан.
Бир күн мурда Грузия парламентинин Укуктук маселелер боюнча комитети "чет элдик агент" жөнүндөгү мыйзам долбоорун биринчи окууда колдогон. Биринчи угуу 16-апрелге белгиленген. Ал өткөн жылы демилгеленип, нааразылык акцияларынан кийин кайра артка кайтарылган мыйзам долбооруна эле окшош.
Сырттан каржыланган жарандык коом уюмдарын чектеп, аларды "чет өлкөлүк агент" деп жарыялоо тууралуу мыйзам долбоорунун оппоненттери ал Орусиянын бийликти көзөмөлдөгөн, сындаган оппозицияга жана эркин медиага басым жасоо үчүн кабыл алынган мыйзамына окшош экенин айтып келишет.
"Чет элдик агент" тууралуу мыйзам постсоветтик өлкөлөр арасында Орусиядан кийин Казакстанда кабыл алынган. 2-апрелде ушундай эле мыйзам Кыргызстанда да иштей баштады. Адатта мындай аныктамага бийликтин ачыктыгын, калыс иштешин талап кылган, көйгөйлөрдү ачык айткан уюмдар жана адамдар туш болот.