Ссылки доступа

Тажик бийлиги Сирия лагерлеринен 47 аял жана балдарды кайтарды


Душанбенин Эл аралык аэропорту. 25-апрель, 2024-жыл.
Душанбенин Эл аралык аэропорту. 25-апрель, 2024-жыл.

Тажик бийлиги Сириядан аялдар менен балдардын дагы бир тобун кайтарды. Расмий билдирүүдө 25-апрелде 13 үй-бүлөдөн турган 47 адам – 15 аял, 17 кыз жана 15 бала Душанбеге атайын каттам менен жеткирилгени айтылат.

Алардын баары “Ислам мамлекети” экстремисттик тобунун мурдагы согушкерлеринин аялдары жана балдары. Бирок бул тууралуу расмий маалыматта айтылган эмес.

Бул аялдардын көбү 2014-2016-жылдары күйөөлөрү менен Сирия жана Иракка барып, 2018-жылы “ИМ” тобу талкалангандан кийин Сириядагы качкындар лагерлерине жайгаштырылган. Балдардын айрымдары Жакынкы Чыгышта төрөлгөн.

"Аялдар жана балдар реабилитациядан жана социалдык интеграциядан кийин үй-бүлөлөрүнө кайтарылат", - деп айтылат маалыматта.

Тажикстандын Кувейттеги жана Сириядагы элчиси Зубайдулло Зубайдзода 25-апрелде Ирак менен Сириядагы тажикстандык аялдар менен балдардын 90% мекенине кайтарылганын билдирди.

2019-жылдан 2023-жылга чейин тажик бийлиги эл аралык өнөктөштөрдүн жардамы менен Сирия жана Ирактагы согуштук аймактардан 334 аялды жана баланы мекенине кайтарган.

Тажик бийлигинин маалыматы боюнча, 2014-жылы “ИМ” тобу Ислам халифатын түзгөнүн жарыялагандан бери 2 миңдей тажик жараны Сирия менен Иракка барган. Көпчүлүгү аялдары жана балдары менен кеткен, кээ бирлери Жакынкы Чыгыш өлкөлөрүндө үй-бүлө курушкан. Алардын көбү өлтүрүлгөн, камалган, же дагы эле дайынсыз.

XS
SM
MD
LG