Бар пояи қарори додгоҳ аз 17 октябр, Маҳмудов шаҳрванди Ӯзбекистон Севара Ғуломоваро, ки барои табобати бемории саратон ба Туркия рафта буд, ба танфурӯшӣ маҷбур кардааст.
Вале вакили дифои ин сокини Бухоро ҳукми додгоҳро ноодилона меномад. Вай хоста буд, ки шахси зери ҳимояаш аз толори додгоҳ озод карда шавад. Наздикони маҳкумшуда мегӯянд, Маҳмудов қурбони раҳмдилии худ шудааст.
Аммо муфаттиши Додситонии нақлиёти Ӯзбекистон 29 ноябр гуфт, ки парвандаи Маҳмудов бо риояи тамоми меъёрҳои Кодекси мурофиавии ҷиноии ин кишвар баррасӣ шуда, дар ҷараёни он ҳамаи ҳуқуқҳои айбдоршаванда таъмин гаштаанд.
Ёдрас мешавем, моҳи августи соли равон расонаҳо саргузашти сокини шаҳри Тошканд Севара Ғуломоваи 37-соларо нашр карданд, ки гуфт, соли 2016 се моҳ дар бардагии шаҳвонӣ қарор дошт. Ба гуфтаи Ғуломова, бародарон Шералӣ ва Алишер Маҳмудовҳо аз вилояти Бухоро ӯро ба танфурӯшӣ дар Туркия маҷбур кардаанд.