Бино ба арзёбиҳои гуногун, дар ин тазоҳурот аз 3 то 5 ҳазор одам иштирок доштанд. Иштирокдорони роҳпаймоӣ мегӯянд, барои он дар тазоҳуроти 3 декабр иштирок карданд, ки бо гузашти ҳудуди 4 сол аз инқилоб дар Украина чизе тағйир наёфтааст.
Ба талаби эътирозгароне, ки ду моҳ мешавад, дар назди бинои порлумони Украина хайма задаанд, қабули қонун "Дар бораи изҳори нобоварӣ ба президенти Украина Петр Порошенко" низ зам шуд. Фаъолон пештар талаб доштанд, ки дахлнопазирии вакилони порлумон бекор, додгоҳи зиддикоррупсионӣ таъсис ва низоми интихоботӣ ислоҳ шавад.
Саакашвилӣ гуфт, Порошенко ба додситонии кул ва хадамоти амнияти Украина дастур додааст, ки ӯро боздошт кунанд. Хадамоти муҳоҷирати Украина 30 ноябр муҳлати будубоши Саакашвилиро, ки шаҳрвандияш дар ин кишвар бекор шудааст, то 1 марти соли 2018 дароз кард. Аммо ба гуфтаи Саакашвилӣ, эҳтимоли ихроҷи ӯ ба Гурҷистон ё Лаҳистон ҳар лаҳза вуҷуд дорад.
