Ссылки доступа

Вазири пешини иқтисоди Қазоқистон мегӯяд, ба ӯ фишор меоранд


Дар додгоҳи шаҳри Остона бозпурсии вазири пешини иқтисоди миллии Қазоқистон Куандик Бишимбоев идома дорад. Бишимбоев дар гирифтани пора ва дуздии маблағе гумонбар аст, ки барои бунёди корхонаи шиша дар шаҳри Қизилурдаи Қазоқистон ҷудо шуда буд.

Вазири пешини иқтисоди Қазоқистон, ки ин айбҳоро рад мекунад, имрӯз дар додгоҳ гуфт, дар раванди тафтишот ба ӯ фишор овардаанд ва ҳуқуқҳояш низ поймол шудаанд.

"Дар моҳҳои аввали боздоштам маро бидуни вакилони дифоам пайваста ба коргоҳи муовини сардори Раёсати тафтишотӣ мебурданд. Далелҳои тасдиқкунанда низ мавҷуданд", - афзуд вай.

Ба гуфтаи Бишимбоев, муфаттишон борҳо ба ӯ пешниҳод кардаанд, то бигӯяд, ки ин корҳоро анҷом додааст. Вай дар баробари онҳое, ки ба ӯ фишор овардаанд, аз муовини сардори раёсати тафтишотии Бюрои миллии мубориза бо коррупсияи Қазоқистон Олес Кексел ва раҳбари гуруҳи фаврӣ-ҷустуҷӯӣ Дамир Бахитов ном бурд.

Вазири пешини иқтисоди Қазоқистон дар посух ба суоли додрас, ки чаро боре дар рафти тафтишот ба бозпурсӣ ҳозир нашудааст, гуфт, "вақте дар як мошини 10-нафарӣ 18 касро савор карда, ба бозпурсӣ мебаранд, магар ин риояи ҳуқуқҳои ман аст ?".

Бишимбоеви 37-сола дирӯз аз президент ва мардуми Қазоқистон барои он ки натавонист "боварии онҳоро бароварда созад", узр хост. Вай бори дигар тамоми айбҳоро рад карда, гуфт, ӯро зердастонаш фиреб додаанд.

XS
SM
MD
LG