Норвегия-Хельсинки комитети менен Борбор Азиядагы адам укуктары ассоциациясынын биргелешкен билдирүүсүндө Тажикстандын бийлиги чет өлкөдө жашаган оппозиция өкүлдөрүнүн туугандарын кысымга алып, каршылаштарынын оозун жабууга аракет кылып жатканы белгиленген.
— Тажик бийлиги Европада жашаган оппозициячы Фатхуддин Саидмухиддиновдун Тажикстандагы туугандарын суракка алып, кысым көрсөтүүдө. 26-ноябрда күч кызматкерлери анын 77 жаштагы атасын жана туугандарын суракка чакырып, Фатхуддин мекенине кайтып келип, кылганына жооп бериши керектигин айтышкан, — деп жазылган билдирүүдө.
Фатхуддин Саидмухиддинов «Фейсбуктагы» баракчасына тажик өкмөтүнүн саясатын сындаган пикирлерин жазып келет. Анын айтымында, мекенинде ага каршы кылмыш иши козголгон. — Мен Тажикстандагы же чет өлкөдөгү бир дагы саясий партиянын мүчөсү эмесмин. Кайсыл берене боюнча кылмыш иши козголгонун да билбейм, бирок мага каршы көрсөтмө бергендер терроризмге жана экстремизмге айыпташкан, — деди ал.
Быйыл сентябрда Тажикстанда тыюу салынган Ислам кайра жаралуу партиясынын мүчөсү Махмуджон Файзрахмон ЕККУнун жыйынында тажик өкмөтүн сындагандан кийин апасы менен эки тууганы суракка чакырылганын билдирген.