Баррасии парвандаи Сатибалдиро додгоҳи шаҳри Остона 1 апрел шуруъ кард.
Хадамоти матбуотии Додгоҳи олии Қазоқистон иттилоъ дод, ки Кайрат Сатибалдӣ баъди қироати айбнома дар посух ба суоли додситон иқрор карда, ки даст ба пулшӯӣ задааст.
Додгоҳи ноҳияи Байконури шаҳри Остонаи Қазоқистон Кайрат Сатибалдиро моҳи сентябри соли гузашта 6 сол зиндонӣ кард. Ӯ дар азхудкунии 12,7 миллиард тангаи "Қазоқтелеком" ва 28,6 миллиард тангаи "Маркази хадамоти нақлиёт"-и Қазоқистон айбдор мешуд.
Хадамоти мубориза зидди фасоди Қазоқистон 13 марти соли 2022 Кайрат Сатибалдиро, ки ба гуфтаи мақомот, мехост, кишварро ба қасди Дубай тарк кунад, дастгир кард. Он замон гуфта мешуд, ки Сатибалдии 51-сола дар "сӯистифода аз мақом ва дуздии дороиҳои ширкати мухобиротии "Қазоқтелеком" дар ҳаҷми махсусан калон" айбдор мешавад.
Қаблан расонаҳо Сатибалдиро ягона муассиси ширкати оффшории "Skyline Investment Company S.A." номида буданд. Forbes Kazakhstan дороии Сатибалдиро 163 миллион доллар арзёбӣ ва ӯро ба рӯйхати бонуфузтарин соҳибкорони Қазоқистон ворид карда буд.