"Моҳи панҷум аст, ки маош намедиҳанд. Ба кортҳои бонкӣ баъзан танҳо 400-ҳазорсӯмӣ мегузаронанд. Маоши боқиро намедиҳанд. Маоши моҳи декабри соли гузаштаро дар моҳи январ қисм-қисм пардохтанд", - изҳор дошт яке аз кормандони "Eriell Group" ба шарти ифшо нашудани номаш.
Ба гуфтаи кормандон, давоми се соли ахир дар ширкатҳои "Eriell Group" ва "Enter Engineering" таъхир дар пардохти маош ба як кори маъмулӣ табдил ёфтааст. Худи ширкатҳо таъхир дар пардохти моҳонаи кормандонашонро шарҳ намедиҳанд.
Кормандон мегӯянд, ҳар касе аз раҳбарият пардохти саривақтии маошро талаб кунад, таҳдид ба ихроҷ хоҳад шуд.
"Eriell Group" ва "Enter Engineering" дар саросари Узбекистон беш аз 200 иншоотро дар ихтиёр доранд. Дар иншооти мазкур корҳои сохтмонӣ, таъмир ва бозсозӣ ҷараён дорад.
Ширкатҳоро ба Бахтиёр Фозилов, олигархи рӯ ба Кремл рабт медиҳанд. Қаблан Бахши узбекии Радиои Озодӣ дар таҳқиқоти рӯзноманигории худ гуфта буд, ки Фозилов ва шарикони олигархи ӯ, ки аз атрофиёни наздики президенти Русия Владимир Путин шумурда мешаванд, бахши энержии Узбекистонро тавассути ширкатҳои худ ғасб кардаанд.