"Куштори бераҳмонаи рӯзноманигори қазоқистон Айдос Содиқов дар шаҳри Киеви Украина набояд беҷазо монад. RSF аз мақомоти Қазоқистон даъват мекунад, ки барои тафтиши беғаразонаи ҳодиса бо мақомоти Украина ҳамкорӣ кунанд", - гуфтааст раҳбари бахши созмон дар Аврупои Шарқӣ ва Осиёи Марказӣ Жанна Кавелйе.
Шахси ношинос 18 июн дар Киев ба самти мошине, ки дар дохили он Айдос Содиқ ва Наталя Содиқова ҳузур доштанд, оташ кушод. содиқов баъди 14 рӯз дар бемористон ҷон бохт.
Додситонии кулли Украина 20 июн гуфт, зидди ду қазоқистонӣ Алтай Жаканбоеви 36-сола ва Майрам Каратаеви 33-сола бо гумони ҳамла ба Содиқов тафтишотро оғоз кардааст.
Мақомоти Қазоқистон хабар доданд, ки Жаканбоев 21 июн ба шуъбаи пулис рафта, худро таслим кардааст. Маҳалли будубоши гумонбари дувум номаълум аст.
Айдос Содиқов соли 2014, баъди он ки дар шаҳри Оқтеппаи Қазоқистон зидди Наталя Содиқова парванда боз шуд, ба Украина рафта, ҳаққи паноҳандагии сиёсӣ дарёфт кардааст. Содиқов мегӯяд, ӯро дар ватан бо ангезаҳои сиёсӣ таъқиб мекунанд. Мақомоти Қазоқистон Содиқовҳоро бо гумони барангехтани бадбинӣ таҳти пайгард қарор додаанд.