Бакиев өзү эки ай мурда түрмөдө каза болгон. Анда расмий версия катары суицид аталган.
Сот өкүмүнө ылайык, Евгений Лукашенко менен Артем Павлов жети жылга, Денис Рязанцев, Владимир Глухих, Владимир Дудин алты жылга жана Юрий Цевун беш жылга соттолду. Булардын баары жаза мөөнөттөрүн өзгөчө жана катаал режимдеги абактарда өткөрүшөт. Соттолуучулар "Сексуалдык мүнөздөгү зомбулук аракети" жана "Атайылап денеге оор залака келтирүү" беренелери боюнча күнөөлүү деп табылышты.
Бакиев 2019-жылы курал-жарак уурдоо айыбы менен жети жылга соттолгон. Ал сотто аялды коргоо максатында ага кол салган адамдын куралын тартып алганын айткан.
2020-жылы Бакиев жазасын өтөп жаткан Иркутск облусунун Ангарск шаарындагы № 15 түрмөдө тополоң чыккан. Ал жакта отургандардын бири түрмө кызматкеринин ур-токмогуна кабылганын айткан соң, жыйырмадай киши тилектештик билдирип кан тамырларын кесип салышкан. Түрмөдө отургандар жетекчиликтин талаптарын аткаруудан баш тартып, ичиндеги жыгач иштетүүчү цехти өрттөп жиберишкен. Бул окуядан кийин түрмөдөгүлөрдүн жарымын №6 колонияга которушкан. Алардын арасында Бакиев да болгон.
Адвокат Наталья Юсупованын айтымында, ал жакта Бакиевди камерада чогуу отургандар түрмө кызматкерлеринин көрсөтмөсү менен кыйноого алып, зордукташкан.
"Камерада чогуу жазасын өтөп жаткандар ар кандай себеп менен жаңжал чыгарып, Бакиевдин динине асылып, анын Куран китебин тытып салышкан. Бакиев түрмө кызматкерлерине арызданса, алар тескерисинче анын колу-бутун байлап, түрмөдөгүлөргө салып берип коюшкан. Аны пол жуучу таяк менен зордуктап, ички органдарына олуттуу доо келтиришкен", – деп билдирген Юсупова.
Бул окуя боюнча 2023-жылдын февраль айында Иркутск шаарындагы Свердлов райондук соту №6 түрмөнүн мурдагы башчысы Алексей Агаповду, ыкчам бөлүмүнүн жетекчи орун басары Алексей Медниковду жана түрмө кызматкери Антон Ерохинди беш жылдан абакка кескен.
Быйыл 6-февралда аталган түрмөнүн жетекчилиги Тохиржон Бакиевдин карындашы Наргизге телефон чалып, агасынын сөөгүн алып кетиши керектигин айткан. Расмий версияга ылайык, Тохиржон асынып алган, бирок жакындары аны өлтүрүшкөн же суицидге жеткиришкен деп эсептеп жатышат. Түрмөдөн жазган акыркы катында Бакиев кыйноонун кесепетин жеңилдетүүгө жардам сурап, "өзү өлдү" деп каза болуудан коркуп жатканын билдирген.
7-февралда сотто Агаповдон, Медниковдон, Ерохинден жана камактагы алты кишиден моралдык чыгым катары 9 миллион рубль (дээрлик 100 миң доллар) өндүрүп берүү тууралуу Бакиевдин арызы карала баштамак. Бирок арыз ээсинин өлүмүнө байланыштуу бул доо боюнча иш токтотулган.