Ссылки доступа

Абактагы каракалпак активистинин абалы начарлап баратат


Даулетмурат Тажимуратов.
Даулетмурат Тажимуратов.

Колониядагы каракалпак активисти Даулетмурат Тажимуратовдун ден соолугу кескин начарлап баратат. Бул тууралуу “Евразия эркиндиги” укук коргоо уюму билдирди.

Август айынын башында Тажимуратовдун апасы Навои шаарындагы күчөтүлгөн режимдеги колонияга барган. Укук коргоочулар казармада активист менен 150 туткун жашап жатканын кабарлашууда. Алар өтө начар шарттарда кармалып турат. Алардын таза суу ичүү мүмкүнчүлүгү жок.

Тажимуратовдун апасы бир айдын ичинде ал 10 килограммга жакын арыктап, араң кыймылдап, жүрөгү айланып, кусуп, эч нерсе жей албай калганын билдирген. Ден соолуктун начардыгы колониядагы мажбурлап иштетүүгө байланыштуу болушу мүмкүн. “Евразия эркиндиги” жазгандай, Тажимуратов акиташ чыгаруучу цехте коргоочу кийим же беткапсыз иштейт. Анын бутунда, колдорунда жана эриндеринде жаралар пайда болгон. Укук коргоочулардын айтымында, активистке медициналык жардам көрсөтүлбөй жатат.

Каракалпакстандагы 2022-жылдагы нааразылык акциясына байланыштуу 16 жылга соттолгон активист Даулетмурат Тажимуратов Навоидеги колонияда отурат.

2023-жылы Өзбекстандын соту Тажимуратовду «бийликти басып алуу же Өзбекстандын конституциялык түзүлүшүн кулатуу боюнча кутум уюштурган» жана «массалык баш аламандыктарды уюштурган» деген сыяктуу бир катар айыптар боюнча күнөөлүү деп тапкан.

Бир катар эл аралык укук коргоо уюмдары, анын ичинде Human Rights Watch уюму аны бошотууга чакырган.

Расмий маалыматтар боюнча, 2022-жылдын июль айында Каракалпакстанда болгон окуяларда 21 адам каза болуп, жүздөгөн адамдар жараланган. Венада жайгашкан Евразия эркиндиги" бейөкмөт уюму Каракалпакстандагы нааразылык акцияларын басуу маалында кеминде 70 киши каза болгонун кабарлаган.

XS
SM
MD
LG