Уурдагандар мектеп окуучуларынын эркиндигин бир миллион найрага (жергиликтүү валюта) баалашкан, бул 620 432 долларды түзөт.
Уурдалган үй-бүлөлөрдүн өкүлү Reuters агенттигине барымтачылар телефон чалганын айтты. Анын билдиришинче, кылмышкерлер акча 20 күндүн ичинде берилбесе, барымтадагылардын баары өлтүрүлөрүн айтышкан.
Нигериянын коопсуздук күчтөрү барымтачылар менен барымтадагылар кайда экенин аныктоого аракет кылууда.
7-мартта Нигериянын түндүгүндөгү Курига айылындагы мектепке элүүгө жакын куралчан адам кол салып, 7 жаштан 15 жашка чейинки 300дөн ашуун окуучуну барымтага алган. Алардын айрымдары кийин бошотулган, бирок кол салгандар кеминде 286 баланы алып кетишкен. Мектеп директору окуучуларды куткарууга аракет кылып жатканда бир адам ок жегенин айткан.
Нигерияда балдарды жана аялдарды уурдоо маал-маалы менен болуп турат.
Куригада балдарды барымтага алуу – 2014-жылы "Боко Харам" радикал тобу 270тен ашуун окуучу кызды Чибок шаарындагы жатаканадан уурдап кеткенден берки эң оор окуялардын бири болуп калды. Алардын 98и али туткунда, кыздар барымтачыларга турмушка чыгууга аргасыз болушкан, кээ бирлери балдары менен үйлөрүнө кайткан.
Учурда балдарды уурдоого эч ким жоопкерчилик ала элек. Associated Press менен Reuters агенттиктери кун үчүн уурдоо тактикасын азыр катардагы кылмыштуу топтор да колдонуп баштаганын белгилейт. Булар жергиликтүү дыйкандар менен чырдашып жүргөн чабандар да болушу мүмкүн.